वर्षात र बाढीपहिरोबाट क्षतिग्रस्त सडक तथा पुलको तत्काल मर्मत र पुनर्निर्माण गर्न सरकारलाई निर्देशन



काठमाडौँ– वर्षात र बाढीपहिरोबाट क्षतिग्रस्त सडक तथा पुलको तत्काल मर्मत र पुनर्निर्माण गर्न सरकारलाई निर्देशन दिइएको छ ।

आइतबार बसेको संसदको विकास तथा प्रविधि समितिले वर्षातका कारण क्षतिग्रस्त सडक तथा पुलहरुको मर्मत, सम्हार तथा पुनर्निर्माणको काम तत्काल सुरु गर्न सरकारलाई निर्देशन दिएको हो । समितिको आईतबार सिंहदरबारमा बसेको बैठकले वर्षातका कारण क्षतिग्रस्त सडक तथा पुलहरुको जीर्णोदार एवम् पुनर्निर्माणको काम तत्काल सुरु गर्न सरकारलाई निर्देशन दिएको हो ।

वर्षाका कारण आएको बाढी, पहिरो र डुबानले क्षतिग्रस्त बनाएको सडक र पुलहरुको जीर्णोदार तथा पुनर्निर्माण कार्य तत्काल सुरु गर्न भौतिक पूर्वाधार तथा यातायात मन्त्रालयलाई निर्देशन दिइएको समितिकी सभापति कल्याणी खड्काले जानकारी दिइन् । त्यसैगरी, बैठकले संघ, प्रदेश र स्थानीय तहमा वर्गीकरण गरिएका क्षतिग्रस्त सडक तथा पुलहरुको जीर्णोदार तथा पुनर्निर्माण कार्य कसले बनाउने भन्ने अन्यौलता अन्त्य गरेर यथाशिघ्र ती सडकहरुको पनि निर्माण कार्यलाई तीव्रता दिन पनि सरकारलाई सचेत गराएको छ ।

सभापति खड्काले दसैं, तिहार, छठजस्ता चाँडपर्वलाई समेत ध्यानमा राखेर वर्षात्ले क्षति पुर्याएका सडक तथा पुलहरु पूर्ण रुपमा संचालनमा ल्याई नागरिकलाई सहज यातायातको प्रत्याभूति दिलाउन पनि सरकारको गम्भिर ध्यानाकर्षण गराइएको बताइन् । समितिले विनाअध्ययन जभाभावी सडक निर्माण कार्य सुरु गरेको पाइएको उल्लेख गर्दै राज्यको स्रोत, साधनको दुरुपयोग हुन नदिन र वातावरण विनाश हुन नदिन पनि त्यस्ता गतिविधि तत्काल रोक्न पनि सरकारलाई निर्देश गरेको छ ।

समितिका सदस्य, प्रभु साहले तीन वटै तहको हानाथापका कारण क्षतिग्रस्त पुल तथा सडकको जीर्णोदार तथा पुनर्निर्माण कार्य अघि बढन नसकेको भन्दै आक्रोश व्यक्त गरे । यता, भौतिक पूर्वाधार तथा यातायातमन्त्री रघुवीर महासेठले वर्षाले क्षति पुर्याएका सबै सडक तथा पुलहरुको मर्मत, सम्हार र पुनर्निर्माणको कामको जिम्मेवारी सरकारले लिने जवाफ दिए ।

उनले प्रदेश र स्थानीय तहको कार्य क्षेत्रमा परेका सडक तथा पुलहरुको निर्माणका लागि सम्बन्धित प्रदेश र स्थानीय सरकारसँग सहकार्य भईरहेको र त्यस्ता सडक तथा पुलहरुको निर्माण कार्यले छिट्टै गति लिने विश्वास पनि समितिलाई दिलाए । बैठकमा मन्त्री महासेठले सडक डिभिजन अन्तरगत वर्षातका कारण ४५ वटा पुलमा क्षति भएको र त्यसको मर्मत, सम्हार र निर्माणका लागि करिव ४७ करोड ३४ लाख बजेट लाग्ने समितिलाई जानकारी गराए ।

प्रतिक्रिया दिनुहोस्